ئەڤڕۆ ئێکشەممێ، 31-12-2023، مەسرور بارزانی، سەرۆکوەزیرانێ هەرێما کوردستانێ ل تۆڕا کۆمەڵایەتییا ئێکس، پەیامەک سەبارەت "هێرشا تیرۆریستییا" سەر بارەگایەکێ هێزێن پێشمەرگەی ل هەولێر بەلاڤکر.
سەرۆکوەزیرانێ هەرێما کوردستانێ د پەیامێدا دبێژیت: "خەمباریا خۆ بەرامبەر هێرشا تیرۆریستییا شەڤا بووری بۆ سەر بارەگەهێ پێشمەرگەی ل باکوورێ ڕۆژهەڵاتا هەولێر دەردەبڕین. ب توندترین شێوە سەرکۆنەیا هێرشا هێزێن دەرڤەی یاسایێ و هەڤکارێن وان دکەم".
مەسرور بارزانی ئاماژە بوێ چەندێژی دا: "ئەم باش ڤان یارییان تێدگەهین کو کەسێن ل یاسایێ دەرچووی ل پشتن، مافێ وێ چەندێژی مە هەیە بەرگریێ ل گەلێ خۆ بکەین".
سەرۆکوەزیران ب پێدڤی دزانیت "حکومەتا فیدراڵ هەر هێرشەکا بۆ سەر هەرێما کوردستانێ ب هێرش بۆ سەر هەمی عێراقێ ببینیت و هەڵوێستێ جیددی هەبیت و ب کریار وەڵامێ بدەتەڤە، ژبەرکو بێ هەڵوێستیی، میلیشاتان زێدەتر هان ددەت بۆ دەستدرێژیێ، ئەو پارە و چەکێ دەوڵەتێ بکاردئینن بۆ هێرشکرنە سەر هەرێما کوردستانێ و نەسەقامگیرکرنا هەمی وەڵات و دروستکرنا شەڕو ناکۆکیان د وەڵاتەکیدا کو خوین رێژتنەکا زۆر بخۆڤە دیتیە".
مەسرور بارزانی داخوازێ ل سەرۆکوەزیرانێ عێراقێ، محەممەد شیاع سوودانی دکەت "ب کریار ڕێکارێن پێدڤی بگرتەبەر بۆ راوستاندنا ئەڤان هێرشان و سزادانا گرووپان و کۆنترۆڵکرنا ئەوان دەڤەرێن بۆ هێرشان دهێنە بکار ئینان".
ئەڤە ددەمەکیدایە شەڤا بووری ( 30-12-2023)، دەمژمێر 11:45 خولەک؛ب درونا بۆمبرێژکری هێرش لسەر بارەگەهەکێ هێزا پێشمەرگەهێ کوردستانێ ل سنوورێ پیرمام-هەولێر هاتە کرن. حکومەتا هەرێما کوردستانێ د راگەهاندنەکێدا گوت، "وێ هێرشێ زیانێن گیانی نەبوون بتنێ زیانێن ماددی هەبوون".
