دەقێ پەیاما سەرۆك بارزانی
بناڤێ خودێ بەخشندە و میهرەبان
ب هەلکەفتا سەرێ ساڵا نوی زاینیڤە پیرۆزباهیێ ل وەڵاتیێن خۆشتڤیێن كوردستانێ و خانەوادێن سەربلندێن شەهیدان و پێشمەرگەهێن قەهرەمان دكەم و هیڤیا خێر و خۆشیێ بۆ هەمی لایەكی دخوازم.
ددەمەکیدا بەرەڤ دەستپێكا ساڵا تازە دچین كو دەڤەر ب گشتی لبن هەڕەشەیا نەسەقامگیریێ و دروستکرنا قەیران و شەڕ و ئاریشەیاندایە. پێدڤیە هەمی لایەك وێ چەندی باش بزانیت گەلێن دەڤەرێ مافێ وانە بشێن ب ئاسوودەی و ئاشتی بژین و چدی دەڤەرامە خۆ لبەر ئاریشە و توندوتیژیێ و تیرۆرێ و نەسەقامگیریێ ناگریت، ئەركێ كۆمەڵگەها نێڤدەولەتیە ژ پێخەمەت پاراستنا ئاشتی و ئاساییش و ڕێکگرتن ل بەرفرەهبونا قەیرانان و هەڕەشان ل دەڤەرێن مە ڕۆڵێ خۆ بگێڕیت و كار ب پابەندییان بكەت. ل ساڵا نویدا ئەو چاڤەرێبوون ل حكوومەتا عێراقا فیدڕاڵ هەیە كو ب ئاراستەیێ چارەسەركرنا ئاریشان دگەڵ هەرێما كوردستانێ و پابەندبوون ب بنەمایێن دەستوورێ و بەرژەوەندیێن گەلێ عێراقێ پێنگاڤێ بهاڤێژیت. پەیاما گەلێ كوردستانێژی بۆ هەمی لایەكی هەردەم پەیاما دیالۆگ و لێكتێگەهشتنێ و چارەسەر بوویە و ئەڤە باشترین ڕێکە بۆ بجهئینانا سەقامگیریێ و ئارامیێ و پێشكەفتنێ.
هیڤی خوازم ساڵا 2024 ساڵا بدوماهیک هاتنا ئاریشەیێن عێراقێ و دەڤەرێن مە بیت و ئاشتی و ئاسوودەی بۆ هەمی وەڵاتیێن كوردستانێ و عێراقێ و هەمی دەڤەرێ دخوازم.
مسعود بارزانی
31ی كانوونا ئێكێ 2023
