رێواز فایه‌ق، سه‌رۆكا په‌رله‌مانێ كوردستانێ د نڤیسینەکێدا ل تویته‌رێ خۆ نڤیسیە: "بڕیارا دادگەها بڵندا فیدراڵی ژبلی هەبونا زیانا راستەوخۆ لسەر شایستەییێن مووچەخۆران و خزمەتگوزارییێن گشتی هەیە، هەڤدەم زەمینەیا لێکتێگەهشتنێ و رێکكەفتنێ دناڤبەرا هەرێمێ و بەغدادا دشێوینیت و ئاییندەیێ کارێ پێکڤە و متمانە بئێککرنێ دئێختە بەر مەترسیێ و گومانێ".
ئەڤەژی ددەمەکیدایە، سپێدەهیا رۆژا چوارشه‌ممێ 25ی كانوونا دووهیێ 2023، لسەر سکاڵایەکا چەند پەرلەمانتارێن پەرلەمانێ عێراقێ سەبارەت ئەو بڕە پارەیێن ئەنجومەنێ وەزیرانێ عێراقێ هنارتی بۆ هەرێمێ دادگەها بڵندا فیدڕاڵی بڕیار ب نەیاسایبوونا هنارتنا ئەوان پاران دا.
مستەفا سەنەد، پەرلەمانتارێ سەربخۆ ئاماژەی بوێ چەندێدا، هەمی ئەو بڕیارێن ئەنجومەنێ وەزیران نها داین بۆ هنارتنا پارەی بۆ هەرێمێ دێ هێنە هەڵوەشاندن، لێ بڕیارێن ئەنجومەنێ وەزیرانێ بەرێ دەم بسەردا چووییە و هاتینە جێبەجێکرن لێ هەر د نەیاسایینە.
هەفدەم حکومەتا هەرێمێ سەبارەت بڕیارا ئەڤڕۆیا دادگەها فیدڕاڵیا عێراقێ سەبارەت ب نەیاسایی ناساندنا هنارتنا هەر جۆرە پارەیەکی بۆ هەرێما کوردستانێ ژلایێ حکومەتا عێراقێڤە دبێژیت، "ئەڤ بڕیارە، پێشێلکرنەکا زەق و ئاشکرایا دەستوورێ عێراقێیە و دژی رێککەفتنا لایەنانە ئیدارا دەوڵەتێ بۆ پێکئینانا حکومەتا نوی".
هەفدەم نێچیرڤان بارزانی، سەرۆکێ هەرێما كوردستانێ راگه‌هاند: بڕیارا دادگەها بڵندا فیدراڵییا عێراقێ ب نەدروستیی هنارتنا شایسته‌یێن دارایی و مووچه‌یێ مووچه‌خۆرێن هه‌رێما كوردستانێ ژلایێ حكومه‌تا فیدراڵییا عێراقێڤە ل ساڵێن 2021 و 2022 بڕیارەکا ته‌واو نەدادپه‌روه‌ر و سته‌مكارانه‌یه.
دبێژیت ژی، "ئه‌و بڕیاره نه‌ك بتنێ مووچه‌خۆران و خه‌ڵكێ كوردستانێ كو وەڵاتییێن عێراقنە، به‌ڵكو هەمی پرۆسه و سه‌قامگیریێن سیاسی و ئه‌ڤێ رێككه‌وتنێژی ب ئامانج دگریت كو حكوومه‌تا نویا فیدراڵییا عێراقێ لسه‌ر هاتیە دامەزراندن".
ژلایەکێ دیڤە، مەسعود بارزانی سەرۆکێ پارتی دیموکراتی کوردستان سەبارەت بڕیارا دادگەها فیدڕاڵی بۆ ب نەیاسایی ناساندنا هنارتا هەر جۆرە پارەیەکی بۆ هەرێما کوردستانێ ژلایێ حکومەتا عێراقێڤە راگەهاندنەک بەلاڤکر و دبێژیت، "بڕیارا دادگەها فیدڕاڵی هەڵویستەکێ دیکەیێ دوژمنکارانەیە بەرامبەر هەرێما کوردستانێ".
