دەقێ پەیامەکێ
وەڵاتییێن خۆشتڤی،من و کابینەیا خۆ ل پێش پەرلەمانێ کوردستانێ و هەوە سویند خوارییە کو کار بکەین بۆ بەرژەوەندیێن بڵندێن گەل و نشتیمانی و پاراستنا کیانێ دەستووریێ هەرێما کوردستانێ، هەر ژبەرڤێ چەندێ ل دەستپێکا ئەڤێ کابینەیێ، وەسا ڕێککەفتین کو شوینەوارێ دوو ئیدارەییێ نەهێلین و بڕیارێن حکومەتێ، لسەرانسەری هەرێما کوردستانێ، ب ئێک شێوە بهێنە جێبەجێکرن.
نابییت ل چ بەشەکێ هەرێما کوردستانێ، بڕیارێن حزبی یان تاکەکەسی، ڕێکێ ل جێبەجێکرنا کار و بەرنامەیێ حکومەتێ بگریت. ئەز ب ئێکسانی، تەماشەی سەرانسەری هەرێما کوردستانێ دکەم و خۆ ب بەرپرسیار دزانم بەرامبەر هەمی وەڵاتیێن هەرێمێ ل هەمی پارێزگەهـ و ئیدارەیێن سەربخۆدا. لێ بلێ بورینڤە، ڕێگری هاتیەکرن و ئاریشە بۆ حکومەتا هەرێمێ هاتینە دروست کرن، کو ئەڤەژی زیانێ ب ژیان و گوزەرانا وەڵاتیيان گەهاندیە.
نێزیکی دوو ساڵانە، ئاریشەیا کۆمکرنا داهات و نەمانا پارەی ل بانکێن سنوورێ سلێمانیێ و گەرمیان و هەڵەبجە و ڕاپەڕین هەیە. دیڤچوونا ئەڤان ئاریشان مە کرییە و لژنەیەک ل وەزارەتا دارایی و ناڤخۆ، بۆ دیڤچونا ئەڤێ ئاریشێ هاتیە پێکئینان، ڵێ ناڤەرۆکا ئەڤێ ئاریشەیێ ئەوە، کو هندەک کەس و لایەن ل پێخەمەت بەرژەوەندیا خۆ، دەستی دئێخنە ناڤ پرۆسەیا کۆمکرنا داهاتێ ئەڤان سنوورانە، و هەر ئەو کەس و لایەنە بەرپرسیارن ل بەرامبەر ئەو زیانێن ب وەڵاتییان و دامودەزگەهێن حکومەتێ دگەهن.
شەفافییەت ئەوەیە کو حکومەت، بخۆ چاڤدێریێ لسەر هەمی پرۆسەیا کۆمکرنا داهاتان بکەت، نەکو بتنێ ئاگەهداری ئەوی بەشی بیت کو بۆ حکومەتێ دهێتە جوداکرن. ل دەستپێکا ئەڤێ کابینەیێ، مە هەوڵدایە داهاتێن هەرێمێ ڕێکبئێخینەڤە و هەتا ئاستەکێ باش سەرکەفتی بووین و هەروەسا، شیایین قۆناغێن بزەحمەتێن بێ داهاتییێ ل دەستپێکا دەرکەفتنا نەخوشیا کۆرۆنایێدا تێپەڕێنین.
وەڵاتیێن بەڕێز،
ماوەیەکە ژلایێ دامودەزگەهێن ئێکەتی نشتیمانيی کوردستانێڤە، کو هەفپشکەکێ سەرەکییێ ئەڤێ کابینێیە، وەسا دهێتە بەحسکرن کو ئابڵوقە لسەر سنوورێ سلێمانیێ هەیە، هەمی شارەزایێن دۆخێ داراییێ هەرێمێ دزانن کو داهاتێ نەفتێ و هەروەسا ئەڤ بەشە بودجەیێ ماوە ماوە ل بەغدا دهات، ب شێوەیەکێ ئێکسان هاتیە دابەشکرن و مووچەیێ کارمەندان پێ هاتیە دان، ئەوا کو جهێ هەڵویستێ بووییە، داهاتێ نەنەفتێ ناڤخۆیێ هەرێمێ بووییە کو بەشەکێ زۆرژی داهاتێ دەروازەیێن سنوورییە، لێ بلێبورینڤە، ڕێک نەهاتیەدان ئەڤ بوارە ل سنوورێ سلێمانی و گەرمیان و هەلەبجە و ڕاپەرین بهێتە ڕێک ئێخستنەڤە، ژبەرڤێ چەندێ سەرکردایەتیێن ئێکەتی، بەرپرسیارن بەرامبەر ئەڤی دۆخێ لڤان دەڤەران دروست بووی.
ئەگەر بەرژەوەندییا وەڵاتییێن مە، لسەرڤەی بەرژەوەندیێن حیزبی بهێتە دانان، ئەوە چارەسەرییا ئەڤی دۆخی یا بسەناهییە و پلان و بەرنامەیێن کارا مە هەنە بۆ چارەسەرکرنا ئەڤان ئاریشان و پێنگاڤێن باش ژی مەهاڤێتینە بۆ چارەسەریێ، لێ بلێبورینڤە ڕێگری هاتەکرن ل جێبەجێکرنێ و دیڤدا کریارا تیرۆرکرنا هاوکار جاف ئەڤ پرۆسە ب تەمامی راگرت.
ئاریشەیێن دارای و بابەتێ کۆمکرنا داهاتی، نێزیکی دوو ساڵانە هەی و دەهان کۆبوونەوە لسەر ئەڤی بابەتی هاتینە کرن و بەرچاڤرونیەکا باش هەبووییە بۆ چارەسەریێ. بڕیارا ئەنجوومەنێ وەزیرانژی هەیە بۆ هنارتنا هێزا هەفپشک بۆ دەروازەیێن سنووری، لێ ئێکەتی نشتیمانی ڕێگر بوو و هەڕەشەیا ئەوێ چەندێ دکر کو ئەگەر ئەڤە بهێتە ئەنجامدان دێ شەڕێ ناڤخۆ ڕوویدەت، ژبەرڤێ چەندێ دئەڤی دەمیدا، زەقکرنا ئەڤی بابەتی، بتنێ بۆ هندێ بوویە داکو تیشک نەکەفتە سەر بابەتێ تیرۆرکرنا هاوکار جاف ل نیڤەکا پایتەختێ هەرێما کوردستانێ. هەرێما کوردستان و پێشمەرگە، هێمایێ ڕووبڕووبونا تیرۆرێ بوونە و نابیت ل ناڤخۆیا هەرێمێ، کەسانەک بۆ ئێکلاکرنا ئاریشێن خۆ دەستی بۆ تیرۆرێ ببەن.
د ئەڤی کەیسیدا،مە چ لایەنەک تۆمەتبار نەکرییە، بتنێ ناڤێ چەند کەسەکێن تۆمەتبار هەیە کو پێدڤیە ڕادەستی دادگەهێ بهێنە کرن و بۆ ئەڤێ مەرەمەژی، ب فەرمی هاتیە نڤێسان ئاراستەیێ لایەنێ پەیوەندیدار ل سلێمانی هاتیە کر . هەر ل دەستپێکێ، مە گوتیە کو لژنەیەکا ڤەکولینا هەفپشک هەبیت و بلا لایەنێ سێیەم، ل ئاستێ نێڤدەولەتیدا، بەشداریێ د ڤەکولینەکێدا بکەن، لێ بلێبورینڤە، هەتا نوکە وەڵامەک بۆ ئەڤێ داخۆازیێ نیە. ئانکو ئاریشە داهات و دۆخێ داراییێ سلێمانیێ نیە، ئەڤا کو هەی ئەڤەیە، داخواز لمە دهێتە کرن کەیسێ تیرۆرکرنا هاوکار جاف بهێتە بێدەنگکرن کو ئەڤەژی داخوازیەکا نەدجهێ خۆدایە و نابیت وەڵاتیێن هەرێمێ قەبیل بکەن.
دۆخێ دەڤەرێ لمەدخوازیت کو ئاریشێن خۆ چارەسەر بکەین و بهێزڤە بەرەف داهاتی پێنگاڤ بهاڤێژین . لێرەدا ژ پێخەمەت بەرژەوەندییا گشتی و تێپەڕاندنا ئەڤێ قۆناغێ، ئەڤ چەند خاڵێن ل خوارێ، دێ ئێخینە بەر ڕایا گشتی و هەمی لایەنان:
ئێکەم: سەبارەت کەیسێ تیرۆرکرنا هاوکار جاف کو هۆکارێ سەرەکیی ئەڤی دۆخێ ئاڵۆزە، داخوازێ دکەم، دەستپێکێ تۆمەتباران ڕادەستی دادگەهێ بکەن و دیفدا لژنەیەکا هەفپشک ل دامودەزگەهێن پەیوەندیدار ب ئامادەبوونا لایەنێن نێڤدەولەتی و نوینەرێن پەرلەمانێ کوردستانێ یان هەر وەڵاتەکێ دۆست کو بخوازیت بەشدار ببیت، بهێتە پێک ئینان، داکو ب زۆیترین دەم ڤەکۆلین دگەڵ وان بهێنە دەست پێکرن و ئەنجامان بۆ ڕایا گشتی ئاشکرا بکەن.
دوویەم: ل دەستپێکا دەستبکاربوونا کابینەیا نەهێ، داخواز دهاتەکرن بابەتێ لامەرکەزییەتێ و شۆڕکرنەڤا دستهەڵاتێ ل داهات و خەرجیان بهێتە جێبەجێ کرن، ژبەرڤێ چەندێ ئەو دەستهەڵات هاتە شۆڕکرنەڤە. نها ژلایێ تیما وزارییا ئێکەتی نشتمانيی كوردستانێڤە، داخواز دهێتە کر خەرجی ببنەف مەرکەزی، ئەگەر ئەڤە دهێتە داخوازکرن ، پێدڤیە کۆمکرنا داهاتیژی ببیتەڤ مەرکەزی و پرۆسەیا کۆمکرنا داهاتی ب تایبەت ل خاڵێن سنووری، ل بن سەرپەرشتیا و چاڤدێریا چڕا مەرکەزیدا بیت. بۆ ئەڤێ مەرەمەژی، پێدڤیە هەماهەنگی دناڤبەرا وەزارەتێن دارایی و ناڤخۆ و پێشمەرگەیدا هەبیت ڕێکێ ل قاچاخچیەتیێ و دەستبرنێ بۆ داهاتێ دەروازەیێن سنووری بگیریت و پێکئینانا هێزەکا هەفپشک بۆ ئەڤێ مەرەمێ زۆر یا پێدڤیە.
سێیەم: پێدڤیە کۆسپ بۆ پرۆسەیا چاکسازی و ئێکگرتنەوەیا هێزا پێشمەرگەی نەهێتە دروست کرن. دئەڤێ کابینەیێدا، ب کریار پێنگاڤ مە بۆ چاکسازیێ ل هێزا پێشمەرگەی و ئێکگرتنەڤێ ناییە و پێدڤیە هێزا پێشمەرگەی، ببیتە هێزەک نشتیمانییا بهێز بۆ بەرگری کرنێ ل کیانیێ دەستوورییێ هەرێمێ و دوورئێخستنا هەڕەشەیان، دوور ژ ئەجێندایێ حیزبی و تاکەکەسی.
چوارەم: ژ پێخەمەت بەرژەوەندییا گشتیی و پرۆسەیا دیموکراسیێ ل هەرێمێ، پێدڤیە هەرچ زۆیە، پەرلەمانێ کوردستانێ رونشتنا خۆ ساز بکەت بۆ کاراکرنەڤا کۆمیسیۆنا بڵندا هەلبژاردنان ، داکو ب کریار، پێنگاڤێ بۆ ئەنجامدانا هەڵبژاردنێ بهاڤێین و پێدڤیە ئەڤساڵ، هەڵبژارتنا پەرلەمانێ کوردستانێ بڕێڤە بچیت و ئەم ل حکومەتا هەرێمێ، بەرهەڤین هەمی پێدڤیێن هەڵبژاردنێ، د زۆترین دەمدا دابین بکەین.
پێنجەم: پێدڤیە لایەنێن سیاسیێن بەشدار ل حکومەتێ، وەک حیزب، پاڵپشتیا حکومەتا هەرێمێ بن و نابیت دناڤ حکومەتێدا بن و ڕۆڵێ ئۆپۆزسیۆنء ببینن. پێدڤیە وەزیر و تیمێن وەزاری، جێبەجێکارێن ئەجێندایێن حکومی بن و نابیت ئاریشە و ئاڵۆزییێن سیاسی ڤوگوهێزن بۆ ناڤ حکومەتێ. تڤیا کێشەیێن سیاسی، ل دەرڤەی حکومەتی هەوڵا چارەسەرکرنێ بۆ بهێتە دان نەکو کارێ حکومەتێ رابگرن.
مەسرور بارزانی
سەرۆکێ حکومەتا هەرێما کوردستانێ
2023/1/15
