لكارنامێدا جه‌خت لسه‌ر هه‌ماهه‌نگیا دناڤبەرا حكومه‌تا فیدراڵی و حكومه‌تا هه‌رێما كوردستانێ هاتیە كرن سەبارەت وان دۆسیه و بڕیارێن تایبه‌تن ب هه‌رێما كوردستانێ.
د به‌شەکێ دیکەیێ كارنامەیا محه‌ممه‌د شیاع سوودانیدا هاتیە، حكومه‌تا هه‌رێما كوردستانێ و حكومه‌تا فیدراڵ پرۆژه یاسایه‌كی سەبارەت نه‌فت و غاز و بودجی لدیف ده‌ستوورێ عێراقێ دماوێ شه‌ش مانگاندا دێ ئاماده‌کەن.
لدیف خاڵا 23ـیێ دناڤا كارنامه‌كێدا هاتییە ب پاڵپشتیا ئه‌ڤ هێزێن سیاسییێن لسه‌ر ئه‌ڤێ كارنامیێ رێككه‌فتین، حكومه‌تا هه‌رێما كوردستانێ و حكومه‌تا عێراقێ دێ هێنە سه‌رپشك کرن بۆ هەڤپەیڤینێ لسه‌ر دۆسیه‌یا نه‌فت و بودجی هەتا ده‌ركرنا پرۆژه یاسایێ نه‌فت و غازێ لدیف ده‌ستوورێ دماوێ شه‌ش هەیڤاندا.
بۆ دارشتنا پرۆژه یاسایا نه‌فت و غازێ د كارنامه‌یا سوودانیدا هاتیە، لیژنه‌یه‌كا تایبه‌تمه‌ند ب كاروبارێن یاساییێن، دارایی و سووته‌مه‌ني ژلایێ حكومه‌تا هه‌رێما كوردستانێ و عێراقێ دێ هێتە پێک ئینان.
ئێک ژ خاڵێن ناڤ كارنامەکێدا دياريكرن و خه‌رجكرنا شایسته داراییێن وان وەڵاتییانە كو بڕیارێن لیژنه‌یا بڵندا جێبه‌جێكرنا مادده‌یێ 140 ڤەدگریت و دووباره پێكئینانا لیژنه‌یه‌كا بڵند پشتی هەیڤەکێ بۆ پێكئینانا حكومه‌تێ.
د برگەیا یاسادانانا كارنامه‌یا حكومه‌تا نویدا هاتییە پرۆژه‌یاسیێ دادگەها فیدراڵی و پرۆژه‌یاسایێ ئه‌نجوومه‌نێ فیدراڵی دماوێ شه‌ش هەیڤاندا دێ دەرچیت.
سەبارەت ئه‌ڤ وان هێزێن دناڤا باژێراندا، د كارنامه‌یا حكومه‌تێدا هاتییە، پێدڤیە سوپا، پۆلیسێ فیدراڵی و حه‌شدا شه‌عبی بچنه ده‌رڤەی باژێران ل جهێ وانا پۆلیسێ خۆجهی و ده‌زگەهێن ئه‌منیی دۆسیه‌یێ ئه‌منیێ دناڤا باژێراندا بگرنه‌ده‌ست.
سه‌باره‌ت وان هێزێن دناڤا باژێرێ كه‌ركووك هه‌ین، دکارنامەیا حكومه‌تێدا هاتیە، فه‌وجا هەوارهاتنێ ژ خه‌ڵكێ كه‌ركووك دێ هێتە پێكئینان داکو دۆسیه‌یا ئه‌منیا پارێزگەهێ بگرنه‌ده‌ست بۆ ئه‌ڤێ مه‌به‌ستێژی هه‌می پێدڤی دێ بۆ هێنە دابینکرن.
سەبارەت وان قوتابخانه‌یێن كوردییێن د‌كه‌ڤنە ده‌رڤەی ئیداره‌یا هه‌رێما كوردستانێ، د كارنامه‌كێدا هاتیە، هه‌می ئه‌ڤ قوتابخانانه دێ چنەڤ سه‌ر ڕێڤەبەریا گشتیا خواندنا كوردی وه‌زاره‌تا په‌روه‌رده‌یا حكومه‌تا فیدراڵی و ڤەکوهاستنا راژه‌یێن وان بۆ ڤان ڕێڤەبەریان.
