دەقێ پەیاما مەسرور بارزانی سەرۆکێ حکومەتا هەرێما کوردستانێ
ئەو هێرش و پەلامارێن هەمەجۆرێن دکەنە سەر هەرێما کوردستانێ، هەوڵێن دوژمن و نەیار و خائینانە بۆ نەهێلانا قەوارەیێ هەرێمێ و وەسا هزر دکەن ب ڤان هێرش و فشارێن بەردەوام، کوردستان دێ هەرەسێ ئینیت.
خەڵکێ تێکۆشەر و نیشتمانپەروەر و حکومەتا هەرێما کوردستانێ، ئیرادەیا وان زۆر ژ هندێ بهێزترە کو ب پیلان و ستەمکاریێ بشکێنن، بەڵکوو ورەیا مە بهێزتر دبیت و ژ ئەنجامدا، تنێ شکەست و ڕووڕەشی بۆ دوژمن وخائینان دێ مینیتەڤە.
سوپاسیا هەڤخەمیا و هەڵوێستێ وڵاتێن دۆست دکەین، کو بەردەوام ڤان هێرشان شەرمەزار دکەن، بەس ب لێدوان و شەرمەزارکرنێ، دوماهیک ب ڤان پیلان و هێرشێن نەرەوا ناهێت و ڕێگریێ ل دووبارەبوونەڤێ ناکەت.
گرنگە پێنگاڤێن کرداری ژڵایێ حکومەتا عێراقێ ڤە بهێنەدان بۆ دوماهیک ئینانا مەترسییا ڤان گرۆپێن ژ یاسادەرچووی و دڤێت ئاسایشا هەمی عێراقێ و ب هەرێما کوردستانێ ژی ڤە بهێتەپاراستن.
داخوازێ ژ وڵاتێن دۆست ژی دکەین، کو ڕێکارێن جدی بگرنەبەر و هەڤکارییا مە یا مەیدانی بکەن، بۆ هندێ ئاسایشا خەڵکێ مە و ئاسایشا ئابووری و سەقامگیریا سیاسی ل هەرێما کوردستانێ یا پاراستی بیت.
داخوازێ ژ خەڵکێ کوردستانێ ژی دکەم، ب خۆڕاگری و ورەیەکا بڵندڤە، ڕووبەڕوویا ڤان پیلانان ببنەڤە و هەستێ نیشتمانپەروەریێ هەر یێ بهێز بیت و رێکێ ب خۆفروش و خاکفرۆش و کۆیلەیێن نەحەزان نەدەن، کوردستان و خەبات و دەستکەفتان، بکەنە قوربانیێن ترسنۆکی و تەماعی و بێویژدانیا خۆ.
داخوازێ ژ خودیێ مەزن دکەم، هێزا زێدەتر بمە ببەخشیت، داکوو بەردەوام بین ل درێژەدان ب ڕێبازا پیروزا کوردایەتیێ و وەفاداری بو خوینا شەهیدان و پشت و پەنایێ مەبیت بەرەڤ سەرکەفتنێ.
مەسرور بارزانی
سەرۆکێ حکومەتا هەرێما کوردستانێ
2024/1/26
