ل سەلاحەددین سەرۆک مەسعود بارزانی پێشوازی ل ستیڤن هیچن باڵیۆزێ بریتانیا ل عێراقێ کر.
ل ڤێ دیدارێدا کو کونسوڵێ نویێ بریتانیا ل هەولێر ئامادەبوو، باڵیۆزێ بریتانیا دووبارە سەرەخۆشیا خۆ ب سەرۆک بارزانی راگەهاند بۆ کارەساتا موشەک بارانکرنا بێ بنەمایا سەر هەولێر کو ژڵایێ سوپایێ پاسدارێن ئیرانێ ڤە هاتە ئەنجامدان و بوویە ئەگەرێ شەهید و بریندار بوونا هژمارەکا وەڵاتیێن سڤیل، لسەر ڤی بابەتی ژی هەڵوێستێ فەرمیێ حکومەتا بریتانیا ب سەرۆک بارزانی گەهاند کو دژی ڤان جۆرە کریارانەنە ب تایبەت کو خەڵکێ سڤیل و بێ تاوان بهێنە ئامانج گرتن
هەر ل ڤێ دیدارێدا بەحس ل بارودۆخ و دوماهیک پێشهاتێن ئەمنی و سیاسیێن دەڤەرێ و عێراقێ هاتەکرن، هەروەسا تیشک ئێخستە سەر کارێ لیژنەیا ڤەکۆڵینا ڕاستیان کو ژڵایێ سەرۆک وەزیرانێ عێراقێ هاتیە پێکئینان بۆ دیڤچوونێ و ڤەکۆڵینێ و دەرئێخستنا ڕاستیان لسەر ڤێ روویدانێ.
ژلایێ خۆ ڤە سەرۆک بارزانی سوپاسیا هەڵوێستێ باڵیۆز و حکومەتا بریتانیا کر، و دووبارە دڵگرانیا خۆ دەربڕی ب ڤێ کریارا نە مرۆڤانە بەرامبەر خەڵکێ هەرێما کوردستانێ هاتیەکرن، و پێزانین هەبوون بۆ هەوڵێن بەڕێز محەممەد شیاع سودانی سەرۆک وەزیرانێ عێراقا فیدڕاڵ بۆ وەرگرتنا هەڵوێست و دیڤچوونا جددی لسەر ڤێ پرسێ.
پەیوەندیێن دناڤبەرا حکومەتا هەرێما کوردستانێ و حکومەتا فیدڕاڵیا عێراقێ و بارودۆخێ ئەمنیا دەشتا نەینەوا و شنگال و گرنگیا جێبەجێکرنا ڕێکەفتنامەیا شنگال تەوەرەکێ دیکەیێ دیدارێ بوو.
