دەقێ روونکرنەڤا بەشێ رۆشنبیری و راگەهاندنا پارتی دیموکراتی کوردستان:
شەڤا بووری مەکتەبا سیاسییا ئێکەتیا نیشتمانی کوردستان پەیامەک سەبارەت ڕوویدانا ئێڤاریا ڕێکەفتی ٧ـی ٤ـی ٢٠٢٣یا فڕۆکەخانەیا نێڤدەولەتیا سلێمانیێ بەڵاڤکر، کو بلێبورینڤە وەکو کارێ وانا یێ هەردەم و عیبرەت ژ مێژوویێ و ب بکارئینانا دەستەواژان وەرنەگرت و، وسا دا دیارکرن کو ئەوا ڕوویدای ژبەر کێماتیەکا ناڤ سەرکردایەتییا پارتی بوویە!، ئەو دەستەواژەیە، کو دناڤا پارتیدا نیە و نابیتژی، لێ وانا نەحەق ناکەین چونکو ژ چاڤ و حاڵێ خۆڤە تەماشە دکەن و خەڵکی دبینن!، حەقن چونکە جاران کێمایەتیەک دناڤا ئێکەتیدا هەبوو، لێ نها ژ کێمایەتیێ بوویە ئێک کەس، نەکو دوو کەس ژی!..
باشترە ئەڤ عەقڵێ بەڵاڤکریێ وان داڕشتی زۆ بخۆدا بچیتەڤە نەک درەنگ، تەماشەی دەڤەرا سلێمانیێ، کو بخۆ دبێژنێ زۆنا کەسک و نەشیاینەژی کەسک بکەن و، هەروەسا ئاوریەکێ ل کردەوەیێن خۆ بدەنەڤە و لۆژیکیانە بارێ سلێمانیێ و خەڵکێ وێ یێ عەزیزێ لبەرچاڤ بگرن و چیدی بەرێن لخۆ مەزنتر هەڵنەگرن و باجەکێژی خەڵکێ ئەڤێ دەڤەرا عەزیز بدەت، ڕاشکاوانە دان ب هۆکارێن ئەڤێ ڕەوشا خرابدا بینن یا بسەر هەوەدا و دەڤەرا سلێمانیێ و بسەر فرۆکەخانەیا نێڤدەولەتیا سلێمانیێدا هاتی و، چیدی ئاخێ نەکەنە چاڤێن خۆ و کادر و جەماوەرێ خۆ.
هەر کردەوەکا پێشێلکاری و بەزاندنا سەروەرییا هەرێما کوردستانێ و دامودەزگەهێن شەرعی شەرمەزار دکەین و، پاراستنا ئارامی و ئاسایشا وەڵات و وەڵاتیێن کوردستانێ ب ئەرکێ خۆ دزانین، قەوارەیا هەرێما کوردستانێ بەرهەمێ دەهان ساڵ خەبات و قوربانیدانا گەلێ مەیە و نابیت چ کەس و لایەنەک ڕێکێ بخۆ بدەت سەروەری و شەرعیەتا دامەزراوان لاواز بکەت و هەرێما کوردستانێ بئێختە بەر مەترسییێ.
بەشێ ڕۆشنبیری و ڕاگەهاندنا
پارتی دیموکراتی کوردستان
٨ـی ٤ـی ٢٠٢٣
