د راگەهاندنا وەزارەتا ناڤخۆدا ئاماژە بوێ چەندێ هاتیە کرن، ژپێخەمەت کێم کرنا دەرفەتا تاوانێ، کابینەیا نەهێ یا حکومەتا هەرێما کوردستانێ ل دەستپێکا دەستبکاربونێ، گرنگی ب بابەتێ رێکخستنا چەکهەڵگرتنێ و سنووردارکرنا دیاردەیا چەکداریێ دایە.
لدیف یاسایا چەکی هژمارە 2یا ساڵا 2022 کو ل پەرلەمانێ کوردستانێ دەرچوویە و چەند رێنماییەک بۆ جێبەجێکرنێ ل وەزارەتا ناڤخۆ دەرکرینە، ئارمانج ژڤان یاسا و رێنماییان ئەڤە کو چەکێ بێمۆڵەت نەمینیت و دیاردەیا چەکداریێ بهێتە سنووردار کرن.
وەزارەتا ناڤخۆ راگەهاندژیک، ل حەفتیا جیهانیا نەهێلانا چەکیدا کو ساڵانە نەتەویێن ئێکگرتی ل 24 هەتا 30 ئۆکتۆبەرێ بۆ سنووردارکرنا چەکێ کۆمەڵکوژ و بەریکانەیا خۆپڕچەککرن ل ئاستێ نێڤدەولاتی و رێکخستنا چەک و دیاردەیا چەکداریێ ل ناڤخۆیا وەڵاتی بڕێڤە دبەت، وەزارەتا ناڤخۆیا حکومەتا هەرێما کوردستانێ داخوازێ ژ وەلاتیان دکەت پێگیریێ ب رێنماییان بکەن و چەکێ قورس و جەنگی، ئەگەر لدەف وانە رادەستی حکومەتێ بکەن، چەکێ ئاگرین ( دەمانچە، کلاشینکۆف و هەڤشێوەیێن وان) لڤان بنکەیان تۆمار بکەن کو هاتینە دەستنیشان کرن.
وەزارەتا ناڤخۆ داخوازێ ل کەناڵێن راگەهاندنێ دکەت، هەفکاریا وان بکەن و رۆڵێ ئەرێنی بگێڕن ل بەلاڤکرنا هۆشیاریا خراپ رەفتارکرن دگەڵ چەکی، کو دەرفەتا تاوان و توندوتیژیێ زێدە دکەت.
