مه‌سرور بارزانی، سه‌رۆكێ حكومه‌تا هه‌رێما كوردستانێ د بیرئینانا 52 ساڵیا ئیمزاکرنا رێككه‌ڤتنا 11ی ئادارێدا په‌یامەک بەلاڤکر.
ده‌قێ په‌یامه‌كێ:
ئه‌ڤڕۆ 52 ساڵ بسه‌ر رێككه‌ڤتناما یازده‌ی ئادارا 1970دا دبووریت، دەمێ شۆڕشا گەلێ کوردستانێ ب سەرکردایەتیا رێبەرێ نیشتمانی مستەفا بارزانیێ نەمر ، حکومەتا وی دەمیا عێراقێ نەچار کر، دان ب بەشەک ژ ماف و داخوازیێن گەلێ کوردستانێدا بنێت.
رێککەڤتناما یازدەی ئادارێ، ئەنجامێ خۆڕاگری و قوربانیدانێن پێشمەرگەهێن قەهرەمان و خەڵکێ کوردستانێ بوو ل شۆرشا مەزنا ئه‌یلوولێ کو خودانێ چەندین داستان و دەستکەڤتێن مازن و مێژووییە.
ئەڤ رێککەڤتنامە ، پەیامەکا روونا گەلێ کوردستانێ بوو کو هەردەم باوەڕی ب دانوستان و گفتوگۆ و چارەسەریا ئاشتیانەیا ئاریشان هەیە.
ئەڤڕۆ ددەمەکیدا ئەڤێ بیرئینانێ دەكەینەڤە، ب لێبورینڤە هێشتا خەڵکەک هەیە دڤێت مافێن دەستووریێن خەڵکێ کوردستانێ بخون، لێ ئەم ب چ رەنگان دەستبەرداری مافێن خوە نابین و هەمی دەمان ئامادەینە لسەر بنەمایێ دەستوورێ، گفتوگۆیەکا به‌رهه‌مدار بکەین ب مه‌به‌ستا چاره‌سه‌ركرنا هەمی ئاریشان.
مەسرور بارزانی
سەرۆکێ حکومەتا هەرێما کوردستانێ
11ی ئادارا 2022
